يا توانسة خافوا

يا توانسة خافوا ، يا توانسة خافوا خيرلكم ، يا توانسة خافوا راهي القاعدة وصلت راهي القاعدة جات وحدها لمن جابها، يا توانسة خافوا ولا نجبولكم بن لادن من بطن الحوت ، يا توانسة خافوا راهي الجزاير تتربص بيكم و بش   تبعثلكم  كردودل، يا توانسة خافوا رهو القذافي مكرز منكم و نويلكم على الشر، حسدينكم رهوا حسدنيكم خاطر انتم عندكم ثورة و هما معندهمش،    يا توانسة خافوا راهي الداخلية بش تكلكم روسكم، راهي مش بش تسيبكم رايضين، يا توانسة خافوا ولا راهم نوين يرجعوا بن علي، يا توانسة خافوا راهم العسكر بش يشدو الحكم و بش ترصلكم تعدوا في عامكم اناس الكل ، يا توانسة خافوا راهي العلمانية مش بش تسيبكم و بش تنحلكم دينكم و تولي لا عاد عندكم لا عيد لا عاشوراء، يا توانسة خافوا راهي النهضة بش تربح الإنتخابات و بش تقص علاكم البيرة، و بش ترصيلكم تعوموا في الناشف، هو صحيح كاتب الدولة ربي يخليه لشباب بش يعمللهم ضربة استباقية و يحلنا اللعب في الزطلة أما زايد ال بيرة لا تعوض، يا توانسة خافوا، يا توانسة خافوا رهوا أمريكا  و فرنسا و روسيa و حتى بنغلادش محضرنلكم مخطط رهيب و حكى علاش أصل مروحتش باللاجئين متاعها بش تنشر فيكم المالريا و السيدا و على دينار الكلب، بذن الله تونس الكل اطول على الحدود و ياحبيبي يا راس جدير